Kendaraan Hate

Pribadi manusa aya anu ngamiliki cahaya bangsa kapangeranan anu disebut anwaarul uluhiyyah anu datang ti Alloh kana hate muridin. Eta cahaya mangrupakeun kendaraan hate anu bisa nepikeun kanu disuprih nyatana madep ka Alloh jeung deketna ti Alloh. Tur mangrupakeun kendaraan sir ati (lelembutan hate) pikeun wawuhna sinareng gusti Alloh. Sareng eta cahaya mangrupakeun balad tentarana hate anu bisa merangan ka musuhna (pangajak nafsu).
Pikeun ngahasilken eta cahaya nyaeta kujalan ngalobakeun dzikir jeung riyadhoh. Lamun dzikir jeung riyadhoh henteu diupayakeun bakal sabalikna, nyatana eta manusa ngabogaan popoek. Eta popoek jadi balad tentarana nafsu anu bisa nepikeun kana ngalajur syahwat, jeung eta popoek perhatianana pikeun kasenangan hirup di dunia.

PENJELASAN.

Pribadi manusa aya anu ngabogaaan cahaya ilahi, ieu anugrah ti Alloh anu datang kana hate Muridin (anu maksud dehes ka gusti Alloh). Pikeun ngaupayakeunnana ulah ngantep maneh, tapi berusaha sangkan diri ngabogaan sinar ilahi. Bisa hasil secara galibna ku ngalobakeun dzikir eling ka Alloh. Lamun diri sering inget Alloh, Alloh ge bakal inget ka urang, Dawuh anjeuna dina al-Quran surat al-Baqoroh ayat 152:

فَاذْكُرُونِي أَذْكُرْكُمْ وَاشْكُرُوا لِي وَلَا تَكْفُرُونِ

Pikeun ngahasilken eta cahaya kahiji nyaeta kujalan ngalobakeun dzikir. Dzikirna bisa ku hate. hate dipusatkeun ka gusti Alloh. Dzikir ku hate bisa kana diri sorangan. Inget ayena keur aya ku Alloh. geus aya bakal eweuh ku Alloh. Inget geus eweuh bakal aya deui ku Alloh, ulah nepika ayena katipu.

يَا أَيُّهَا الْإِنسَانُ مَا غَرَّكَ بِرَبِّكَ الْكَرِيمِ (6) الَّذِي خَلَقَكَ فَسَوَّاكَ فَعَدَلَكَ (7 سورة الإنفطار

Rengkak polah kicep igeg henteu lepas tina kersana gusti Alloh. Inget kana anugrah anu katarima eta paparin ti Alloh. Diri mah teu boga daya upaya, teu boga kakuatan pikeun boga anugrah kajaba pitulung Alloh, karasa diri lemahna.
Dizkir bisa ku jalan ngabaca anu ‘Am (umum) contona makhluk anu aya gigireun, harepeun, luhureun, eta sadayana cukup dipake renungan hate inget ka yang widi, Alloh anu kagungan cipta. Hate dipake melong kana tapak damel Alloh, tuluy akhirna nyambung jeung Alloh anu kagunganana, sabab ku Alloh dipiwarang dina al-Quran surat at-Thoriq 5-6:

فَلْيَنظُرِ الْإِنسَانُ مِمَّ خُلِقَ. خُلِقَ مِن مَّاء دَافِقٍ

Tafakur umum diparentah ku Alloh dina suroh al-Ghosyiah 17-22:

أَفَلَا يَنظُرُونَ إِلَى الْإِبِلِ كَيْفَ خُلِقَتْ (17) وَإِلَى السَّمَاءِ كَيْفَ رُفِعَتْ (18) وَإِلَى الْجِبَالِ كَيْفَ نُصِبَتْ (19) وَإِلَى الْأَرْضِ كَيْفَ سُطِحَتْ (20) فَذَكِّرْ إِنَّمَا أَنتَ مُذَكِّرٌ (21) لَّسْتَ عَلَيْهِم بِمُصَيْطِرٍ

Dzikir ku lisan. kalimat-kalimat pikeun tadzakur ka Alloh dikedalkeun ku lisan, nyeeurkeun baca kalimat-kalimat anu berharga, contona:

سبحان الله والحمد لله ولا اله الا الله والله اكبر ولا حول ولا قوة الا بالله العلي العظيم .

Malah لا اله الا الله pangutama-utamana kalimat dzikir. Langkung sae disetelkeun sareng asmana Alloh. Eta teh upaya-upaya pikeun narimana cahaya.
Kadua ku jalan riyadhoh, ngalatih jiwa ngadangukeun nasehat-nasehat ulama. Eta upaya pikeun ngabogaan cahaya. Dimana teu kitu, ngantep maneh, naudzubillah paur sabalikna. Lain narima cahaya tapi popoek hate nu dipimilik.
Jalma anu ngabogaan cahaya berarti parantos ngagaduhan hiji kendaraan pikeun nepikeun kana tujuan. Akhirna bisa madep ati ka gusti Alloh, bisa aya dina muhadloroh sinareng gusti Alloh. Karasa ku hate, Alloh teh hadir. Alloh teh deukeut kusabab urang boga kendaraan.
Sir ati lelembutan hate boga kendaraan, akhirna bisa tembus pandang wawuh jeung nu agung, deket jeung nu agung. Tapi lamun teu ngabogaan cahaya, akhirna bakal narima popoek hate. Jadi pilaburan, surem, teu bisa tembus pandang, teu wawuh jeung nu kagungan.
Cahaya anu aya dina hate teh ngabogaan balad bantuan(tentara hate). Lamun geus boga cahaya berarti hate boga balad bantuan, bisa nepikeun kana tujuan, bisa ngelehkeun ka musuh anu rek ngaganggu, ngagunasika, anu rek nyilakakeun. Saha anu jadi musuh anu matak mawa cilaka? Nafsu anu aya didiri.
Sarua nafsu ge boga balad tentarana, nyaeta balad tentarana teh dzulmah (popoek hate). Bongan tara dzikir ka Alloh, bongan tara riyadhoh akhirna hate jadi poekeun, tung-tungna nafsu boga balad ku popoekna. Dimana popoek nu kapimilik, maka nafsu ngabogaan batur, boga balad pikeun ngahasilkeun ngalajur nafsu anu ngalarah nganter syahwat, anu mawa kana jalan maksiat lain mawa kana jalan toat.
Ari tina cahaya mah perhatian kana masalah kahirupan abadi di akherat, anu jadi qiblat jeung anu ngajadi idaman teh kahirupan akherat, da eta hirup anu abadi. Tapi ari nafsu mah kalah ngangajakna teh hayang senang dina waktu anu teu sabaraha. Hayangna teh nu penting keur hirup di dunia senang, ngarasa puas, masalah akherat mah teu jadi perhatian, jadi akhirna lolong pilamburan.
Tah ieu dua balad bantuan antara balad bantuan hate nyaeta cahaya jeung balad bantuan nafsu nyaeta popoek teu weleh perang ti baheula.

ما زال الحرب وقعا بين قلب و نفس

“Henteu ereun-ereun pangajak hate jeung pangajak nafsu bakal perang”
Hiji hamba anu dipimaksad ku Alloh masihan pertolongan ka hambana, maka Alloh bakal maparin cahaya sinar dina hetana ku balad bantuan cahaya. Akhirna bisa mengkek merangan kana syahwat nafsuna, syahwat nafsu eleh ku aqalna. Jeung bakal bisa maca alusna toat gorengna maksiat. Kusabab bisa maca kana alusna toat gorengna maksiat, akhirna diri henteu tertipu.
lamun jalma anu elehna teh hate ku nafsu, balad tentara hate anu eleh, balad tentara nafsu anu menang, maka akhirna bakal sabalikna. Henteu kabaca hadena toat, henteu kabaca gorengna maksiat, jeung bakal kahalang tina bisana wusul tembus pandang ka gusti Alloh, bakal putus ti gusti Alloh. Dina hatena pinuh ku popoeuk jeung pinuh ku makhluk. Cukup eta popoeuk dina hate jeung makhluk anu narapel dina hate ngajadikeun penghalang teu bisa maca, henteu bisa tepung jeung sang kholiq, sabab kahalangan ku makhlukna.
Makhluk anu jadi panghalang kana hate teu bisa tembus pandang ka yang widi. Makhluk anu ngahalangan kana hatena jeung popoekna anu henteu bisa maca kana hadena amal soleh, henteu bisa maca kana gorengna amal maksiat akhirna lempang sakadaek.
Jadi jelas bahwa modal pikeun kalulusan, modal pikeun dugina tujuan kabagjaan, modal pikeun wawuh jeung nu agung deukeut jeung nu agung maka perlu upaya ngabogaan cahaya.

Waspada Diri Tina Anu Ngaganggu Rasa Ngamulyakeun Ka Alloh

Alloh marentah ka urang supaya ngalaksanakeun parentah Alloh, sabab Alloh anu marentah dina waktu sajero hirup di dunya. Alloh ngancam ka urang, lamun anu dipigawe lain pedah Alloh anu marentah, lawang langit moal kabuka, surga moal kaasupan. Kalolobaan urang teu ngalaksanakeun parentah teh ku pedah urang mangeran deui kasalian Alloh leuwih ngagugu ka salian Alloh leuwih ngamulyakeun ka salian Alloh.

PENJELASAN.

Dawuh Alloh dina al-Quran surat ar-Rum ayat 30:

فَأَقِمْ وَجْهَكَ لِلدِّينِ حَنِيفًا ۚ فِطْرَتَ اللَّهِ الَّتِي فَطَرَ النَّاسَ عَلَيْهَا ۚ لَا تَبْدِيلَ لِخَلْقِ اللَّهِ ۚ ذَٰلِكَ الدِّينُ الْقَيِّمُ وَلَٰكِنَّ أَكْثَرَ النَّاسِ لَا يَعْلَمُونَ

Dina ayat 40 surat al-A’rof Alloh :

إِنَّ الَّذِينَ كَذَّبُوا بِآيَاتِنَا وَاسْتَكْبَرُوا عَنْهَا لَا تُفَتَّحُ لَهُمْ أَبْوَابُ السَّمَاءِ وَلَا يَدْخُلُوونَ الْجَنَّةَ حَتَّىٰ يَلِجَ الْجَمَلُ فِي سَمِّ الْخِيَاطِ ۚ وَكَذَٰلِكَ نَجْزِي الْمُجْرِمِينَ

Dasar urang dihirupkeun ku Alloh ayeuna di dunya, prinsip urang hirup di alam dunya anu ayeuna parantos ditangtukeun ku Alloh. Hirup di alam dunya jeung sosial masing-masing. Tangtu petani jeung dunia pertanianana, pedagang jeung sakabeh kagiatan dagangannana, pejabat jeung sagala tugasna.

(اللَّهُ خَالِقُ كُلِّ شَيْءٍ وَهُوَ عَلَى كُلِّ شَيْءٍ وَكِيلٌ " (الزمر‏:62)

“Teu aya hiji perkara anu diluar katangtuan Alloh, Alloh anu ngadamel kana sagala hal".

Aya sababaraha model kahirupan kelompok manusa, sadayana oge Alloh anu ngadamel termasuk kana فِطْرَتَ اللَّهِ الَّتِي فَطَرَ النَّاسَ عَلَيْهَا ۚ . Manusa anu interaksi dina ekonomi, politik, pertanian, sebagai mahkluk sosial, budaya anu beda-beda, adat anu macem-macem eta teh kahirupan anu ku Alloh ditangtukeun. Maka فَأَقِمْ وَجْهَكَ لِلدِّينِ حَنِيفًا ۚ , Sadayana henteu aya anu henteu katepi ku parentah dasar hirup eta.
Saorang Pajabat, ku jabatanana kudu jadi pendorong kayakinan diri ka Alloh, jabatan kudu jadi pangdorong pikeun diri ningkatkeun kualitas dipayuneun Alloh. Anu dagang, ekonomi dagangna oge kudu jadi pangdorong pikeun diri, jadi manusa anu berkualitas dipayuneun Alloh. Nyakitu deui patani , TNI, polisi, kiyai, santri sadayana ge sami.
Kagiatan, kabiasaan kelompok naon bae anu melekat ka diri urang, sadayana dasar parentah ti Alloh. Kudu diperlakukeun bener, anu imbasna ka diri leuwih cenderung dengdek kana agamana Alloh, leuwih milih kana kayakinan dirina ka Alloh. Tangtu sebuah kayakinan teh awal manusa bersikap. Sebuah keyakinan bisa terbukti tina sikap jeung prilakuna, lamun omongan teu akur jeung buktina berarti bohong. Naon anu diucapkeun, naon anu ditekadkeun, kudu akur jeung naon anu dilakukeun, anu kitu ngarana bener. Lamun teu kitu, bohong ngarana.
Contoh, jalma ngarekeun kuring sieun ku hileud eta acan bukt. Bere hileud, lamun dibere hileud lumpat maka bener jalma etan sieun ku hileud. Tapi lamun ngomong nyebut sieun ku hileud, dibere hileud malah di oprek, eta mah omongannana bohong.
Alloh pangeran, anu ngayakeun, anu marentah, anu ngalarang maka فَأَقِمْ وَجْهَكَ لِلدِّينِ حَنِيفًا ۚ sagala sikap jeung prilaku kudu menang sumber tidinya. Kupedah mangeran ka Alloh, ku pedah Alloh anu marentah, kuring migawe pedah diparentah. Kulantaran Alloh anu ngalarang, kuring henteu migawe kupedah dilarang ku Alloh.
Contoh puasa bener-bener mangrupakeun mutaba’ah ka Rosul lain hayang begang. Puasa mutlak ibadah ka Alloh lain nyingkahan tina panyakit.
Tangtu dina suroh Yunus ayat 58, Alloh ngadawuh:

(قُلْ بِفَضْلِ اللَّهِ وَبِرَحْمَتِهِ فَبِذَلِكَ فَلْيَفْرَحُوا هُوَ خَيْرٌ مِمَّا يَجْمَعُونَ (58

Saur Ibnu Athoilah jalma anu geus konstan dina ngalaksanakeun hirupna teh aya dina kaayaan kupedah parentah jeung larangan, maka teu aya kabahagiaan anu sejen, puncak kabahagiaan, kasuksesan hirup justru datang dina nalika proses diri keur ngalaksanekeun parentah, dina proses diri keur ngahindar dina anu dicarek ku Alloh, eta kabahagiaan anu paling utama jang urang anu mangeran ka Alloh, anu yakin Alloh pangeran, anu yakin Alloh marentah, Alloh teh anu ngalarang.
Anu jadi masalah nyaeta saeutik manusa anu bisa hirup model kitu, lolobana mah kaluar tina katangtuan eta. Make tiung kupedah nutupan aib dina sirah, puasa kupedah hayang bebas tina kolestrol nurunken lemak. Loba parentah Alloh anu dilakukeun tapi lain kupedah Alloh anu marentah. Loba ngahindar tina anu dicarek ku Alloh tapi prinsipna lain kupedah Alloh anu ngalarang. Naon sababna? وَهُم مُّشْرِكُونَ lolobana manusa didinya kajebak, hirup dikomando lain kuparentah jeung larangan. Saha anu ngomando? Nya tangtu lamun lain Alloh, emosi jeung syetan anu ngomandona.
Saperti urang geus uninga sadayana, bahwa komando anu ngalaksanakeun parentah leungeun jeung suku urang, anu marentah urang usik, anu marentah urang ngeksekusi teh sabab Alloh anu marentah, lain asumsi pamikiran anu kadorong emosi. Sedengkeun aya warning ti Alloh

إِنَّ الَّذِينَ كَذَّبُوا بِآيَاتِنَا وَاسْتَكْبَرُوا عَنْهَا

“Manusa anu sombong, sombong ngarasa leuwih mampu tibatan Alloh, buktina leuwih alus ninggalkeun Alloh sabab keur ngalaksanakeun gagasan anu keur dipikiran sorangan, sombong dipayuneun Alloh.”
Alloh ngagero tuluy ngabaikeun panggero Alloh sabab embung diganggu da keur enjoy jeung naon anu aya dina pikirannana. Jauh ninggalkeun Alloh sabab ngungudag asumsi pamikiran, mangkat ninggalkeun pangeran sabab leuwih kaharti keneh anu aya dina pikiran dirina.
Nah jalma anu model kitu:
1. Didunyana moal terbuka kahirupan anu nyata pikeun dirina.
Dimana wae cicing bakal jadi manusa anu keur ngarantau, dinu caang bakal ngarasa poek, dina poek bakal ngarasa caang, batur tiris manehna hareudang, batur hareudang manehna tiris, dunia henteu bisa dinikmati kudirina.
Ongkoh nafas kaluar-kajero tapi teu ngemplong kana dadana, nafas mah dikaluarkeun-dikajerokeun tapi henteu matak cukup oksigen anu dibutuhkeun ku jantungna, eungap we karasana. Maka hirupna terombang-ambing naon anu dipimilik ku dirina. Sakabeh anu dipimilik heunteu jadi sumber kabahagiaan malah jadi sumber beban pikeun dirina. Dibere duit beurat teu bisa usik sabab beurat kuduitna. Dibere jabatan teu bisa migawe anu sejen, sabab ngarasa beurat kujabatannana. Katindes ku kahirupan dunya. Dunya anu kuduna ditumpakan, pikeun jalma nu kitu mah malah dipapanggul.
2. Surga lain jang manusa anu model kitu.
Kudu bungah manusa anu ku Alloh ditempatkeun jadi manusa anu tukang imtisal jeung ijtinab, terserah naha eta dorongan sanubari atawa dorongan jalma sejen, naha aya dina kaayaan kapaksa atawa lain kupedah kapaksa.
Kuhal sakitu, anu kudu diwaspadai jeung anu perlu dicermati ku urang nyaeta jaga, waspadai diri bisi leuwih ngamulyakeun diri tinimbang Alloh, leuwih ngagugu ka diri dari pada ka Alloh, leuwih ngahargaan diri dari pada ngamulyakeun Alloh. Manusa loba keneh anu kitu dari pada ngarasa dirina jadi hamba anu hina dipayuneun Alloh.
Mudah-mudahan nasehat Ibnu Athoilah intina kabahagiaan anu sejati, abadi jeung nyata nyaeta manusa anu keur ngalaksanakeun parentah kupedah diparentah ku Alloh, jalma anu ninggalkeun larangan kupedah dilarang ku Alloh lain kupedah anu sejen. Dimana manusa geus wani ngalakukeun hiji perkara nepi ka ninggalkeun parentah Alloh kupedah enjoy keur ngalaksanakeun parentah pribadina, maka ancaman Alloh di dunya-na langit moal kabuka, dina harti moal meunang kahirupan anu bungah di dunya-na, diakherat surga teu bisa diasupan kujalma model kitu.

Jalma Nu Hanjakal mah Jalma Nu Teu Ngaji

Rosululloh saw. parantos ngadawuh:

أَشَدُّ النَّاسِ حَسْرَةً يَوْمَ الْقِيَامَةِ مَنْ يُمْكِنُهُ طَلَبُ الْعِلْمِ فِي الدُّنْيَا فَلَمْ يَطْلُبْهُ , وَرَجُلٌ عَلِمَ عِلْمًا فَانْتَفَعَ بِهِ مَنْ سَمِعَهُ مِنْهُ ددُونَهُ

“Pangnalangsana jalma dina poe qiyamah nyaeta jalma anu boga kasempatan pikeun nyuprih elmu tapi manehna hente nyuprih kana eta elmu”..

Penjelasan

Rosululloh ngawanti-wanti ka ummatna bisi jadi jalma anu meunang kahanjakalan anu pohara. Nyaeta manusa anu ngabogaan kasempatan pikeun neangan elmu tapi eta kasempatan teu digunakeun. Ieu mangrupakeun pepeling ti Kanjeung Rosul ulah sampe hanjakal. Hanjakal mah moal tiheula, tapi datangna pandeuri saba’da ngalaman kerugian.
Untung Kanjeung Nabi sosok anu nyaah ka ummatna, sahingga Rosul ngajaga ka ummatna ulah sampe tisoledat kana jurang kasangsaraan. Kusabab kitu, urang salaku ummatna kudu beunang dipika-nyaah ku Kanjeung Rosul.
Ditilik tina sababaraha seugi urang sarerea kaasup jalma anu dibere kasempatan ku Alloh pikeun neangan elmu:
1. Ditilik tina segi umur, umur masih keneh ngora, masih ditanggung jawab ku sepuh. Usia muda usia anu meujeuhna berjuang ngusir kabodoan ngadatangkeun kacerdasan jeung kapinteran. Dimana, di usia muda otak masih kosong can loba sagala perkara anu nempel, eta sangat mumkin dipake pikeun tholabul ilmi.
2. Alloh masihan kasehatan. Sehat hiji modal pikeun hasilna tholabul ilmi.
3. Sepuh anu ngadukung.
4. Aya biyaya.
Hal ieu kudu digunakeun pikeun tholabul ilmi. Jadi santri anu rajin, anu alus budi pekerti, anu ngabogaan akhlakul karimah, siap taat disiplin. Eta kalebet ngagunakan kasempatan anu dipasihkeun ku Alloh swt. Lamun teu kitu, dina nalika tiba diakherat bakal jadi jalma anu nyeusel, bahkan didunya keneh ge geus mulai karasa hanjakalna. Sabab tanpa ngabogaan elmu, hirup bakal serba terbatas, ngarasa terisolir, rek hirup dimana bae bakal ngarasa disisihkeun kupedah lemah kamampuan.
Matak bersyukur ka Alloh swt, masih dipasihan kasempatan pikeun tholabul ilmi. Ayeuna masih usia muda, kudu digunakeun sing sungguh-sungguh:

شَبَابَكَ قَبْلَ هَرَمِكَ

“Mempeung anjeun ngora memeh kolot”..

Geus kolot mah boro-boro tholabul ilmi, eweh kasempatan pikeun tholabul ilmi, komo kudu mondok di pondok pasantren, saba’da boga pamajikan mah kudu maraban pamajikan. Geus kitu mah teu mikirkeun deui masalah elmu, anu aya mikiran masalah parab pikeun keluarga.
Meungpeung sehat memeh gering. Gunakeun kasehatan ieu samemeh datang panyakit. Salurkeun kasempatan pikeun neangan pangarti, bahkan ulah wani sare samemeh ngahafal, ulah wani tambah umur dina itungan poe samemeh datang pangarti. Papatah dina kitab Ta’limul Mutta’alim:

وَكُنْ مُسْتَفِيْدًا كُلَّ يَوْمٍ زِيَادَةً # مِنَ الْعِلْمِ وَاسْبَحْ فِىْ بُحُوْرِ الْفَوَائِدِ

“Satiap poe kudu jadi jalma anu neangan tambahan-tambahan pangarti, bahkan kudu teuleum dina lautan elmu”..

Ulah ngan sakadar nempokeun wungkul kana elmu, tapi kudu terjun kalautan, nyeulaman dina lautan elmu. Insya Alloh bakal jadi jalma anu bahagia, berkah, jadi jalma anu paling untung manakala dina satiap saat tambah pangarti bari dibarengan ku amaliah.
Meungpeung sepuh tanggung jawab, batur mah loba anu hayang masantren tapi sepuhna teu satuju lamun budakna ngaji di Pondok Pasantren, sabab sepuhna kurang ngarti kana agama. Aya oge jalma anu ngarti kana agama, budakna hayang masantren nyakitu deui sepuhna oge hayang masantrenkeun tapi teu boga bekel pikeun masantrenkeun, sahingga budakna teu aya kasempatan pikeun tholabul ilmi.
Urang mah alhamdulillah, sepuh ngarestuan, siap mekelan, tanggung jawab. Berarti ieu mangrupakeun kasempatan pikeun tholabul ilmi. Lamun teu digunakeun ieu kasempatan pikeun neangan elmu sampai tuntas, maka bakal jadi jalma anu super hanjakal di poe qiyamah.
Bahkan lamun ieu kasempatan hente digunakeun, tatkala sakarat bakal jejeritan hayang distop heula ulah waka tulus dicabut nyawa. Dauhan Alloh dina suroh al-Mu’minun ayat 99-100:

حَتَّى إِذَا جَاءَ أَحَدَهُمُ الْمَوْتُ قَالَ رَبِّ ارْجِعُونِ (99) لَعَلِّي أَعْمَلُ صَالِحاً فِيمَا تَرَكْتُ

“Ya...Alloh balikeun abdi ka alam dunya, stop Ajroil ulah waka nyabut nyawa, balikeun deui nyawa kana sakabeh badan, balikeun kuring hirup ka alam dunya. Sabab kuring rek amal sholeh heula, rek tholabul ilmi heula”..

Tapi sadayana oge moal mumkin, dauhan Alloh deui dina suroh al-A’rof ayat 34:

إِذَا جَاءَ أَجَلُهُمْ لَا يَسْتَأْخِرُونَ سَاعَةً ۖ وَلَا يَسْتَقْدِمُونَ

“Manakala ajal geus datang, perjanjian waktu ajal geus datang, teu bisa dipajukeun jeung dipundurkeun”..
Matak ceuk Malaikat, sambungan tina suroh al-Mu’minun ayat 100:

كَلَّا إِنَّهَا كَلِمَةٌ هُوَ قَائِلُهَا وَمِنْ وَرَائِهِمْ بَرْزَخٌ إِلَى يَوْمِ يُبْعَثُونَ

“Inget, eta teh ngan sakadar omong kosong, janji-janji rek amal sholeh, lamun enya ge dibere kasempatan balik deui ka alam dunya bakal saperti waktu anu geus kalewat.”.

Akhirna dicabut ku Malaikat, maotna molotot kusabab maotna aya rasa kapanasaran. Termasuk anu dibere kasempatan neangan elmu tapi teu digunakeun. Ulah tanggung kapalang jadi santri, ulah waka kaluar ti pondok pasantren saba’da geus jadi Ustadz beulah dituna geus jadi Kiai, geus boga kamampuan anu loba.
Jadi kulantaran kitu, waktu teh mangrupakeun modal utama. Lamun tukang usaha waktu teh diumpamakeun receh, tapi jang santri mah waktu teh diumpamakeun elmu. Ulah aya waktu anu kalewat tanpa neangan elmu. Anu matak jalma anu teu ngagunakeun waktu pikeun neangan elmu jeung amal sholeh eta bakal rugi. Dauhan Alloh dina suroh al-Ashr:

وَالْعَصْرِ . إِنَّ الْإِنْسَانَ لَفِي خُسْرٍ

“Demi waktu, saenyana manusa aya dina karugian.”.

Bisa bebas manusa tina karugian lamun eta jalma iman jeung amal sholeh. Diantara amal sholeh teh nyaeta ngagunakeun waktu dina kasempatanana pikeun neangan elmu jeung amal sholeh. Insya Alloh moal jadi jalma anu rugi, bakal bebas tina rasa hanjakal anu kacida.

Dina Setiap Waktu, Aya Kode ti Alloh

Tempat Alloh ngabuktikeun parentah jeung larangan eta dina waktu anu bukti. Anapon waktu anu teu bukti (anu geus kaliwat) parentah jeung larangana oge geus kaliwat. Anu can karandapan, parentah jeung laranganana oge can datang.

Syetan ngagendang ka urang supaya teu ngalaksanakeun parentah anu aya dina waktu keur karandapan. Ku cara sok nembongkeun waktu anu can karandapan atawa anu geus kaliwat. Kusabab kitu, ulah kagendang ku syetan, perhatikeun waktu anu keur karandapan.

Penjelasan

Ta’aluq sifat qudrot bukti Alloh anu kawasa. Memeh Manusa jeung alam diciptakeun, Alloh parantos ngadamel catatan dina loh mahfudz naon nu rek diayakeun, naon nu rek diewehkeun, nu kumaha bentukna, sabaraha lilana eta teh geus ditulis di loh mahfudz.

كُلٌّ فِىْ كِتَابٍ مُبِيْنٌ

“Sadayana tos jelas dina catatan lauhil mahfudz”.(Q.S. Hud:6)

Ta’aluq tanjizi hadist teh salah sahiji bukti tina eta catatan. Deretan saha anu dilahirkeun jeung saha anu maot, saha anu nasibna hade jeung goreng eta teh geus dituliskeun. Dihim pinasti anyar pinanggih eta teh praktekna ditilik tina rangkean waktu. Jadi waktu teh hakekatna mah tempat ebrehna parentah jeung larangan. Dimana ayana parentah jeung larangan pasti dibarengan nempel dina fakta anu dibikeun ka satiap pribadina manusa.

أَفَحَسِبْتُمْ أَنَّمَا خَلَقْنَاكُمْ عَبَثًا وَأَنَّكُمْ إِلَيْنَا لَا تُرْجَعُون سورة المؤمنون 155

رَبَّنَا مَا خَلَقْتَ هَذا بَاطِلاً سُبْحَانَكَ فَقِنَا عَذَابَ النَّارِ 191 سورة آلعمران

Maka satiap waktu anu aya, pasti turun fakta kanyataan hirup ka diri. Dina fakta kanyataan hirupna diri, didinya aya parentah jeung larangan nu kudu langsung direspon. Responsif (teu acuh) kana eta kajadian bakal ngajadi amal.

الَّذِي خَلَقَ الْمَوْتَ وَالْحَيَاةَ لِيَبْلُوَكُمْ أَيُّكُمْ أَحْسَنُ عَمَلًا ۚ وَهُوَ الْعَزِيزُ الْغَفُور 185 سورة آلعمران

Potongan surat al-Imran ayat 185 kaasup kana responsif pribadi urang terkait parentah jeung larangan ditilikk fakta hirup. Tangtu:

فَمَنْ يَعْمَلْ مِثْقَالَ ذَرَّةٍ خَيْرًا يَرَهُ . وَمَنْ يَعْمَلْ مِثْقَالَ ذَرَّةٍ شَرًّا يَرَهُ

“Hade ngarespona bakal ebreh ,goreng respon urang oge bakal ebreh.“ (Q.S. al-Zalzalah:7 & 8)

Anu jadi masalah teh dina waktu. Waktu anu bisa diproduksi ku urang sahingga ngajadi bahan produk unggul teh dina nalika waktu anu keur karandapan atawa waktu anu ker jalan diharepen urang.
Lain waktu anu henteu keur bareng jeung urang. Mana waktu anu henteu keur bareng jeung urang ? Kamari, eta waktu teu bareng jeung urang. Atanapi isukan anu can datang oge can nempel jeung urang. Waktu anu nyata waktu anu karandapan mah waktu ayeuna, waktu anu keur babarengan jeung urang.

الَّذِي يُوَسْوِسُ فِي صُدُورِ النَّاسِ

Eta teh teori syetan supaya manusa hirupna teu produktif versi allah, kahirupanana teu unggul mungguh allah, tung-tungna rugi jang dirina.

وَالْعَصْرِ (١) إِنَّ الإنْسَانَ لَفِي خُسْرٍ (٢)

“Manusa bakal cilaka kusabab waktu. Balukarna bakal jadi manusa anu rugi”. (Q.S. al-Ashr:1 & 2)

إِلا الَّذِينَ آمَنُوا وَعَمِلُوا الصَّالِحَاتِ وَتَوَاصَوْا بِالْحَقِّ وَتَوَاصَوْا بِالصَّبْرِ ٣

“tapi waktu bisa mere kauntungan piken manusa anu iman lamun ngarespon kana parentah jeung larangan anu aya dina fakta hirup”. (Q.S. al-Ashr:3)

Ari fakta hirup mah teu loba, ngan aya 2:
1. Akur jeung kahayang, akur jeung harepan.
2. Teu akur jeung kahayang.
Lamun lain pekara anu akur, lain anu dicita-cita pasti eta perkara teh anu teu dipikaharep ku urang. Lamun lain nasib anu dipikaresep pasti nasib anu teu dipikaharep. Jadi resep jeung teu resep, bungah jeung teu bungah, gundah jeung gelisah eta mah perkara anu mangrupakeun kode. Ngodean naon? ngodean cara ngarespon. Lamun bungah, respona syukur. Lamun susah respona sobar. Lamun untung, respon anu jadi amal bawaeun balik teh ku syukurna. Lamun rugi, anu jang bawaeun amal teh ku sabarna. Lamun gering, nu jadi bawaaeun balik teh sobarna. Lamun cager, syukuranana anu bakal jadi bawaeun balik ka akheratna.
Lamun dibere sedih nuturkeun kasedih berarti teu jadi amalan jeung teu ngajadi dangdanan ka akherat. Atawa dibere kabungah ngan ukur bisa euforia eta ge sami moal jadi amal.
Nah, syetan nyekel ka satiap pribadi urang teh ku nyodorkeun waktu anu geus teu bisa diproduksi deui. Kan aya kawajiaban anu dibere waktu, tapi bisa diqodoan (diproduksi deui). Saperti tingalen subuh bisa diqodaan berangna?? Tah, parentah jeung larangan anu dibawa ku waktu, tegesna sobaraneun jeung sukuraneun eta mah moal bisa diqodoan.
lamun wae teu direspon dina nalika waktu anu ker berjalan, maka lepot teu ngajadi amal. Syetan bakal mere ka urang waktu-waktu anu geus basi (waktu anu geus kaliwat) atawa waktu can karandapan kadiri (waktu anu can kasorang). Supaya naon? dimana dibere waktu anu geus kaliwat, urang bakal terus ngarenung jeung ngarasa nyesel tina kajadian anu pernah tumiba. Antukna, tina rasa nyesel bakal timbul poho kana waktu anu ker karandapan teu digunakeun bahan amal, tapi cukup ngarasa bener kupedah ngalamunan anu ges kasorang.
Diebrehkeun ku syetan teh waktu anu can karandapan, anu can kasorang kadiri. Hate bingung kunu can terjadi, rek kumaha isukan, rek jadi naon, bisa dahar atawa moal, padahal waktu nu dibingungkeun teh can aya nempel ngajadi kawajiban piken diri. Akhirna syetan bakal ngarasa sukses ku lampah urang nu teu bisa ngamanfaatkeun waktu anu ker karandapan, sabab manehanana terus-terusan mere gambaran-gambaran nu geus atawa nu can kasorang.
Saur Ibnu ‘Athoilah:

مَا تَرَكَ مِنَ الْجَهْلِ شَيْئًا مَنْ أَرَادَ أَنْ يُحْدِثَ فِى الْوَقْتِ غَيْرُ مَا أَظْهَرَهُ الله فِيْه

“Teu katinggaleun saeutik oge jadi jalma anu meles belet kupedah nyimpulkeun kana waktu anu teu ditembrakeun ku allah dina waktu nu kasorang jang dirina. Ruksak jang jalma anu tukang ngaengke-engke.” .

Matak ku hal sakitu, hayu urang tinggalkeun tina jalma anu disebut ku Ibnu ‘Athoilah (jalma nu pang beletna) nyaeta jalma anu mikir-mikir kana waktu nu can karandapan atawa mikir kana waktu anu ges kalewat, cul waktu anu ker karandapan teu direspon piken amal jang dirina.
Ken nu geus terjadi mah, mun goreng gura giru tobatan, mun alus mudah-mudahan ditampi ku Allah. Pikaharepeun menta ka Allah dijaga jeung diraksa kusatarna Allah supaya diri ulah tisoledat kana salah bari menang jaminan ti Allah dosa bakal dihampura. Jalma anu karaksa mah bakal menang pangjagana. Saha jalmana?? Nyaeta jalma nu mokuskeun kana ngalaksanakeun parentah jeung larangan anu keur karandapan bari sampurna teu kabengbat ku naon-naon. Satiap parentah anu aya dilaksanakeun, amprok jeung anu dicarek pasti dijauhan. Jalma nu kitu teh jalma nu taqwa ka Allah, Muttaqin ngarana.