Isro Mi'roj

 Ku : K. Ang Hidayatus Shibyan Asy-Syafi’ie

سُبْحَانَ الَّذِي أَسْرَى بِعَبْدِهِ لَيْلا مِنَ الْمَسْجِدِ الْحَرَامِ إِلَى الْمَسْجِدِ الأقْصَى الَّذِي بَارَكْنَا حَوْلَهُ لِنُرِيَهُ مِنْ آيَاتِنَا إِنَّه هُوَ السَّمِيعُ الْبَصِيرُ

Hartosna : “Maha Suci Dzat anu ngaleumpangkeun abdina dina waktu peuting ti masjidil Harom ka Masjidil Aqsho anu disakurilingna pinuh ku barokah, sabab Kami rek ningalikeun kana tanda-tanda (Kakawasaan) Kami. Saestuna Allah eta Dzat anu ngadangu tur anu ningali”. (QS. Al-Isro’ ayat 1)

Ari percaya kana kajadia Isro Mi’roj ka asup kana ‘Aqidah Sam’iyyat. Ari ‘Aqidah Sam’iyyat nyaeta perkara anu wajib di tekadkeunnana ku sabab pasti buktina da geus didawuhkeun ku Al-Qur’an jeung Hadits. Lamun jalma ragu-ragu atawa mangmang komo lamun teu percaya kana Isro Mi’roj maka batal ‘Aqidah Sam’iyyatna. Lamun batal ‘Aqidah Sam’iyyatna maka batal imanna.

Ari Isro Mi’roj teh leumpang ti Masjidil Harom di Makkah ka Masjidil Aqsho di Palestina. Ari Mi’roj mah nyaeta ngapung ngawang-ngawang, ngapak mega, ngambah jomantara naek ka langit nincak ‘Alam Nasut, ‘Alam Malakut, ‘Alam Jabarut jeng ‘Alam Lahut.

Diluar Isro Mi’roj Allah ngameunangkeun manusa jeung Jin pikeun nembus langit, sakumaha dawuhanna-Na dina surat Ar-Rahman 33 :

يَا مَعْشَرَ الْجِنِّ وَالإنْسِ إِنِ اسْتَطَعْتُمْ أَنْ تَنْفُذُوا مِنْ أَقْطَارِ السَّمَاوَاتِ وَالأرْضِ فَانْفُذُوا لا تَنْفُذُونَ إِلا بِسُلْطَانٍ

Hartosna :”He, golongan jin jeung manusa ! lamun aranjeun kaduga kana nembus atmosfir langit jeung bumi, pek geura tembus ku aranjeun, tapi moal bisa nembus kana eta atmosfir kajaba kudu make kakawasaan”. (QS. Ar-Rahman ayat 33)

Ari Sulthon/kakawasaan hisi anu bisa dipake nembus langit nyaeta :

1	Kakawasaan anu gede   :	kawasa	K 4
2	Pangarti anu loba             :	kanyaho
3	Modal anu gede               :	kaboga
4	Wawanen anu leber       :	kawani

Ari Shulthon ma’ani nyaeta :

1.       Mu’jizat               2. Karomat          3. Ma’unat          4. Istidraj

Intipati anu dicandak ku Rosulullah SAW. Anu jadi bekel pikeun naek ka langit saba’da di operasi, di piceun tempat syetan tina manahna teras dikumbah ku cai zamzami, lajeung dieusian ku :

1.       Iman, anu sabener-benerna Iman (haqiqotul Haqiqoh

2.       Islam anu kuat

3.       Mental sobar jeung hilim

4.       Ilmu anu nyagara

5.       Kayakinan anu kuat dina nyekel Agama

Urang salaku umatna moal bisa Mi’roj haqeqi nepika ka alam Lahut saperti Nabi, ngan lamun Mi’roj ma’ani (naekkeun tingkat jeung darajat dipayuneun Allah) bisa, nyaeta ku jalan anu lima. Ngan ari Nabi mah langsung pamasihan langsung ti Allah, ari urang mah kudu ngusahakeun diri sorangan, nyatana :

1.       Kudu bisa ningkatkeun kana Iman, minimal Iman ‘Ilmul Yaqin, ari jalan ngami’rojkeun/naekkeun iman nyaeta aya tilu :

a.       Muqorrobah, nyaeta ngahias diri ku amal hade. Ari carana Muqorrobah aya lima :

1)      Maca Qur’an bari mikir-mikir kana eusina lamun ngarti, lamun teu ngarti yakinkeun nu dibaca eta kalam ilahi.

2)      Shalat tahajjud tengah peuting 

3)      Mindeng masamoan jeung jalma-jalma anu sholeh

4)      Beuteung ulah wareg teuing, ulah kosong teuing. Sarta ulah dieusian ku barang anu haram

5)      Dzikir wengi menjelang waktos shubuh

b.      Uzlah, nyaeta ngasingkeun diri ti makhluq, rek ‘Uzlah Bidayah, nyaeta ngajauhkeun diri ti makhliq nu sejen seja ngawungkulkeun diri ibadah ka Allah, atanapi ‘Uzlah Nihayah, nyaeta awak mah tetep campur gaul jeung batur, tapi hate teu tagiwur, tetep reureujeungan jeung Allah nu Maha Ghofur.

c.       Tafakkur, kana lima perkara :

1)      Tafakkur kana maot.

2)      Tafakkur kana ni’mat jeung siksa kubur

3)      Tafakkur kana Surga jeung Naraka

4)      Tafakkur kana Sama’ jeung Bashorna Allah

5)      Tafakkur kana Tapak Qudrotna Allah

2.       Kudu ngagem Islam anu kuat

Ari Islam teh nyaeta :

وَضْعٌ اِلٰـهِـىٌّ سَائِقٌ لِذَوِى الْعُقُوْلِ السَّلِيْمَةِ باِخْتِيَارِهِمِ الْمَحْمُوْدِ اِلٰى مَايَصْلُهُ مَعَادَهُمْ وَمَعَاشَهُمْ

Hartosna : “Aturan Allah anu ngagiring ka Makhluq anu boga akal sampurna (manusa) kalayan ku pamilihna sorangan kana jalan pimaslahateun dina kahirupan dunya jeung pangbalikan akheratna”.

3.       Ngabogaan mental Shobar jeung Hilim/bijaksana, tegesna “Leuleus jeujeur liat tali, landung kandungan laer aisan, tara nitah kana getas harupateun”.

4.       Ilmu anu loba, Henteu aya poe anu kaliwat kajaba ku nambahan ilmu tur teu boga rasa diri geus pinter. Sabab nu boga rasa geus pinter eta ciri jalma bodo. Malah beuki tambah ilmuna kudu beuki tambah rasa bodona (saperti pare beuki ngeusi beuki tungkul). Geuning Rosululloh anu sakitu luhur elmu panemuna jembar panalarna tur digayuh ku Allah, masih keneh diparentah ngadu’a :

وَقُلْ رَبِّ زِدْنِى عِلْمًا ) سورة طٰـهَ ۱۱۴

“Ucapkeun ku anjeun mugi Gusti nabihan elmu ka abdi”

5.       Kayakinan nyekel agama anu kuat. Henteu unggut kalinduan, henteu gedag kaanginan, henteu runtuh ku diasongan tahta, henteu leeh ku dibibita ku harta jeung wanita.

Ieu mental anu 5 kudu di mantelan/dibungkus ku polah anu 4, nyaeta :

1)      Shiddiq, sanggup bener keur diri sorangan, bener dina tekad, bener dina niat jeung bener dina polah, henteu neangan kana “Meunang” ngelehkeun batur.

2)      Amanah, kapercaya dina nyekel agama anu dititipkeun ku Allah kamanehna.

3)      Tabligh, sanggup nepikeun jeung ngada’wahkeun agama anu nyampak dina dirina.

4)      Fathonah, pinter dina sagala widang, pinter nempatkeun diri dina shirot anu kudu dileumpangan, pinter dina nangtungkeun hujjah agama.

Lamun jalma geus bisa ngusahakeun jeung nerapkeun mental anu lima sarta dimantelan kunu opat bieu, tangtu imanna bakal naek nepika ‘alam Lahut. Bisa Muhadloroh jeung Allah saperti kangjeng Nabi, sarta bakal meunang pangkat Wali Allah. Insyaallah.

Wallahu A’lamu.

Al-Faqir Ang Hidayatus Shibyan Asy-Syafi’ie