MULANG KA ALLAH

 اَلْحَمْدُ ِللهِ الَّذِيْ اَمَرَنَا بِالتَّقْوَى لِنَيْلِ رِضَاهُ . اَشْهَدُ اَنْ لَّا اِلَهَ اِلَّا اللهُ وَحْدَهُ لَا شَرِيْكَ لَهُ وَ اَشْهَدُ اَنَّ سَيِّدَنَا وَنَبِيَّنَا مُحَمَّدًا عَبْدُهُ وَرَسُوْلُهُ . اَللَّهُمَّ صَلِّ وَسَلِّمْ عَلَى سَيِّدِنَا مُحَمَّدٍ وَعَلَى ءَالِهِ وَصَحْبِهِ وَمَنْ تَبِعَه‘ اِلَى يَوْمِ الْقِيَامَةِ . اَمَّا بَعْدُ فَيَا عِبَادَ اللهِ اِتَّقُوْا اللهَ بِامْتِثَالِ اَوَامِرِهِ وَاجْتِنَابِ نَوَاهِيْهِ . اَعُوْذُ بِاللهِ مِنَ الشَّيْطَانِ الرَّجِيْمِ : وَ اَنِيْبُوْا اِلَى رَبِّكُمْ وَ اَسْلِمُوْا لَهُ مِنْ قَبْلِ اَنْ يَأْتِيَكُمُ الْعَذَابُ ثُمَّ لَا تُنْصَرُوْنَ

Hadirin Ahli Jum`ah, Rahimakumullah !.

 

Pidawuh Gusti Allah SWT anu nembe dioskeun mangrupi lajengan ayat anu sateuacanna anu ditujukeun ka jalmi-jalmi anu hirupna katalanjuran dina ngalajur hawa nafsu tunggul dirarud catang dirumpak, teu malire batal sareng haram, tapi Gusti Allah Anu jembar Pangampura tur Maha Welas Asih teu bade nutup kanyaah sareng pangampura ka sing saha bae anu leres-leres ngamaksad babalik pikir, Gusti Allah ngalarang putus asa, ulah pegat pangharepan tina miharep kanyaah sareng pangampura-Na.

 

Lajengan eta ayat nyaeta sakumaha daoskeun nembe dina bubuka khutbah tadi anu pihartoseunana: " Jeung geura marulang ka Pangeran aranjeun, sarta geura sumerah diri ka Anjeunna samemeh siksaan tumiba ka aranjeun turta aranjeun henteu bisa ditulungan deui". .{ QS. Az-Zumar, ayat 54 }.

Gusti Allah miwarang sangkan enggal-enggal geura saladar, babalik pikir, areling ka Mantenna, teu kenging tonggoy bae dina ngalajur hawa nafsu, ngumbar syahwat, hare-hare, teu merduli piwarangan sareng larangan. Gusti Allah miwarang sumerah diri ka Mantenna ku ngalaksanakeun kataatan sareng nebihan cegahanana, miwarang narurut kana anu pangsae-saena anu diturunkeun, buktosna Al-Qur`an. Hal ieu bilih kabujeng ditibanan siksaan ku Gusti Allah kalawan dadaksakala dina kayaan henteu saladar. Margi dimana-mana siksaan tos tumiba mah bakal aya jalmi anu nyarios sakumaha pidawuh Gusti Allah dina terasan eta ayat :

 

اَنْ تَقُوْلَ نَفْسٌ يَّا حَسْرَتَى عَلَى مَا فَرَّطْتُّ فِيْ جَنْبِ اللهِ وَ اِنْ كُنْتُ لَمِنَ السَّاخِرِيْنَ

 

" Duh, kaduhung kaula tina saniskara kataledoran kaula payuneun Allah, jeung saestuna kaula teh ti antara jalma-jalma anu ngageuhgeuykeun ".

Atanapi bakal aya anu nyarios:

 

لَوْ اَنَّ اللهَ هَدَانِيْ لَكُنْتُ مِنَ الْمُتَّقِيْنَ

 

" Upama Allah maparin pituduh ka kaula mah tanwande kaula teh jadi ti antara jalmi-jalmi anu tarakwa".

Atanapi sapalihna aya deui anu nyarios nalika ningali siksaan :

 

لَوْ اَنَّ لِيْ كَرَّةً فَاَكُوْنَ مِنَ الْمُحْسِنِيْنَ

 

" Upama kaula dipulangkeun deui { ka dunya } mah tanwande kaula jadi ti antara jalma-jalma anu ngalampahkeun kahadean".

Cariosan jalmi-jalmi anu sapertos bieu ku Gusti Allah diwaler:

 

بَلَى قَدْ جَائَتْكَ ءَايَاتِيْ فَكَذَّبْتَ بِهَا وَاسْتَكْبَرْتَ وَ كُنْتَ مِنَ الْكَافِرِيْنَ

 

" Padahal sabenerna geus datang ka anjeun ayat-ayat Kami, tapi anjeun ngabohongkeun, anjeun takabur { sombong }, anjeun ti antara golongan jalma-jalma kafir ".

 

Dina dinten kiyamat isukan, nasibna jalmi-jalmi anu ngalakukeun kabohongan-kabohangan ka Allah bakal katingal raray-rarayna harideung {tarutung geheng}, eta teh jahannam tempat mulangna jalma-jalma anu takabur, sombong.

 

وَيَوْمَ الْقِيَامَةِ تَرَى الَّذِيْنَ كَذَّبُوْا عَلَى اللهِ وُجُوْهُمْ مُسْوَدَّةٌ قلى اَلَيْسَ فِيْ جَهَنَّمَ مَثْوًى لِّلْمُتَكَبِّرِيْنَ

 

" Jeung dina poe qiyamat, Anjeun { Muhammad } bakal ningali jalma-jalma anu nyieun-nyieun kabohongan ka Allah tea, beungeutna tarutung geheng. Naha lain di jahannam tempat mulangna jalma-jalma anu takabur teh ?". { QS. Az-Zumar, ayat 60 }.

 

Hadirin, Rahimakumullah !.

 

Ieu ayat-ayat Al-Qur`an pidawuh Anu Maha Suci khususna ditujukeun ka jalmi-jalmi kafir waktos harita jaman kanjeng Nabi SAW, tapi umumna ka jalmi-jalmi anu tukang gawe ma`siyat, kalebet jalmi-jalmi anu iman tapi hirupna ngalajur hawa nafsuna, silo, katipu ku pasilitas kahirupan dunya anu kapimilik, sahingga ngalahirkeun sikep nukang-nonggong kana aturan ti Gusti Allah, sombong, ngaguguyonkeun aturan-aturan agama, nyapirakeun piwarangan sareng larangan Allah, ku kalakuan kituna mungkin akhirna mah janten jalmi anu kafir anu teu percaya kana kahirupan akherat, teu percaya kana ayana balitungan amal di akherat, kaluar tina iman sareng islam. Na`udzubillahi min dzaalik !.

Muga-muga urang sadaya kalebet jalmi-jalmi anu iman sareng amal soleh sarta dijantenkeun jalmi-jalmi anu husnul khotimah disarengan Pangampurana Allah SWT. Aamiin !.