Nu Kumaha Ciri Dewasa Dina Ibadah?

 

Nu Kumaha Ciri Dewasa Dina Ibadah?

            Pada dasarna, ibadah teh mangrupakeun darmaning parentah, darmaning bakti. Rek nu bentukna ibadah mahdhoh (sholat, puasa, zakat, wiridan, munggah haji jeung sajabana), atawa nu ghoer mahdhoh (dagang, ngajar, digawe, neangan nafkah jeung sajabana) upayakeun kudu dilakukeun murni atas dasar parentah jeung bakti ka Alloh SWT.

 

 

لا اله الّا الله لا موجود الّا الله

 

“Di dieu kieu ayeuna abdi tapak damel Alloh”.

 

لا اله الّا الله لا معبود الّا الله

 

“Dina damel anu ieu abdi bakti ka Dzat Alloh”.

 

لا اله الّا الله لامطلوب الّا الله

 

“Dipidamel kalakuan pedah parentah Dzat Alloh”.

 

لا اله الّا الله لامقصود الّا الله

 

“Dipidamel kalakuan malar ridlona Dzat Alloh”.

 

 

Naon nu matak ngalebur, ngahambat niat jeung nu ngaganggu dina kaikhlasan ibadah?

            Nyaeta tujuan-tujuan anu sejen, motivasi nu kadang sok ngaharewos kana hate nalika amal, pedah sok loba katingali tulisannana jeung kadenge yen aya pahala dina ibadah.

            Mangrupa-rupa pahala anu dijanjikeun ku Alloh ulah dugi ka jadi motif/tujuan utama amal sahingga diri jadi kaluar tina prinsip kaikhlasan. Sok sanajan daek amal pedah motivasi pahala, ngajauhan dosa ku pedah sieun siksa eta teh kaasup derajat ikhlas mubtadi’in (pemula). Tapi dina hal ieu, kudu aya upaya latihan ngadewasakeun amal ibadah sangkan kualitas amal aya peningkatan. salah sahijina ku jalan ngatur hate dina masalah niat.

Numawi saur Ulama Tasawuf (Syekh Ibnu Ath-Thoillah) :

 

كَيْفَ تَطْلُبُ الْعِوَضَ عَلَى عَمَلٍ هُوَ مُتَصَدِّقٌ بِهِ عَلَيْكَ

 

“Rek kumaha urang (wani mikiran) hayang meunang buruhan tina ladang amal, sedengkeun urang bisa amal ge eta teh mangrupakeun anugrah ti Alloh”.

 

Urang mah La Haula Wala Quwwata Illa Billah, teu aya daya upaya kecuali ku pitulung Alloh. Dina nalika urang bisa ngalaksanakeun parentah Alloh (daek sholat, daek tadarus, daek amal ibadah), bisa/mampu ngajauhan ma’siat, ulah timbul perasaan eta teh hasil kamampuan urang, tapi semata-mata urang bisa amal ibadah teh mangrupakeun pitulung ti Alloh SWT.
Ilustrasina sederhanana:

Budak leutik nu embung mandi, hese dititah ku indungna... sahingga nepi ka disabunan, disampoan, diandukan, diwedakan, diparfuman, dipakekeun baju ku indungna. Pokna teh ngomong eta budak “mamah... dede bageurnya kersa ibak?.. atuh ukeun acis mah kangge jajan”.

Lamun ilustrasi eta dikaitkeun, naha pantes urang nembong-nembong kabutuh menta buruhan ka Alloh tina sabab amal ?

            Hartina bahwa, mangrupakeun pagawean jeung garapeun urang ngabenerkeun amal mah, ulah mikiran ganjaran/pahala, da eta mah geus puguh dijanjikeun ku Alloh. Tinggal urangna ngupayakeun jeung ngalatih diri sangkan ningkat kadewasaan dina amal ibadah.

Wallohu A’lam bi Showab