RIYADLOH KEMIS
*QURAN BISA JADI UBAR PANYAKIT DOHIR BATIN*
وَنُنَزِّلُ مِنَ الۡـقُرۡاٰنِ مَا هُوَ شِفَآءٌ وَّرَحۡمَةٌ لِّـلۡمُؤۡمِنِيۡنَۙ وَلَا يَزِيۡدُ الظّٰلِمِيۡنَ اِلَّا خَسَارًا
"Kami nurunkeun tina Al-Qur'an ayat-ayat anu bisa jadi ubar jeung jadi rohmat pikeun Mu'minin. Jeung ari Al-Qur'an teu nambah ka jalma anu dolim kajaba kana karugian".
Dina ayat-ayat Al-Qur'an aya anu bisa jadi ubar, dimana dibaca, bari didawamkeun macana, komo bari apal hartina jeung maksudna, aya anu bisa jadi ubar tina saban panyakit, boh panyakit dohir atawa batin, panyakit kabodoan, panyakit karaguan, ka tugenah hate, malah panyakit jasmani, bisa di jampe di ruqiyah, ku bacaan Al-Qur'an.
Tapi make catatan "Syifaun Lil Mu'minin" jadi ubar soteh pikeun Mu'minin lain pikeun Kafirin.
Sing getol macana sing faham ma'nana, komo nepika ngarti maksudna, in sya Alloh, bisa jadi ubar anu pang mujarabna tina sagala panyakit.
Oge jadi rohmat, jadi damai, aman, timbul rasa nyaah ka batur oge pasti dipikanyaah ku batur.
Jadi rohmat oge bisa dihartian jadi penyelamat, nu nyalametkeun engke di akherat. Nyalametkeun tina pakewuh qiyamah, salamet tina hisaban, salamet tina shirot.
Dawuh Kangjeng Rosul;
اقْرَؤوا القُرْآنَ، فإِنَّهُ يَأْتِي يَوْمَ القيامةِ شَفِيعًا لأَصْحابِهِ
“Baca Al-Qur'an, sabab dina poe Qiyamah bakal datang pikeun nulungan nu sok macana" (HR Baihaqi)
Mugi urang sadaya dipasihan taufiq pitulung pikeun daek maca Qur'an, daek tadabbur, mikiran eusi Qur'an, daek ngadawamkeun tadarus, pikeun nyageurkeun sagala panyakit dohir batin anu aya di diri urang jeung sakabeh Muslimin.
Tidak ada komentar:
Posting Komentar